اللغة المصرية القديمة مش مجرد رموز على الجدران، لكنها انعكاس للحياة اليومية للمصري القديم.

المصري القديم كان عنده عادة لغوية عبقرية في تسمية الحيوانات على حسب أصواتها الطبيعية، طبعاً مش كل الحيوانات متسميه بالطريقة دي، ولكن ده بيعتبر من أقدم الأمثلة على “الأونوماتوبيا” أو محاكاة الصوت، وكأن المصري القديم كان بيسمع الحيوان وينطق اسمه من صوته.

الظاهرة دي بتورينا قد إيه كان المصري قريب من الطبيعة، وبيتعامل معاها بوعي وملاحظة دقيقة.

1. القط (ميــو)

• الكلمة المصرية القديمة للقط كانت “ميــــو” (miw).
• الاسم ده جاي مباشرة من صوت المواء اللي بيصدره القط.
• القط كان ليه مكانة خاصة جدًا: في البيت كحارس من الفئران، وفي الدين كرمز للربة”باستت”.
• المصري القديم خلّد العلاقة دي بتسمية الحيوان بأوضح صوت بيصدر منه.

2. الكلب (إيــو / أووو)

• الكلب في المصرية القديمة اسمه “إيو” (iwiw).
• الاسم مرتبط بصوت النباح “أوو أووو”.
• الكلب كان رمز للإله “أنوبيس” (ابن آوي)، إله الموتى وحارس المقابر.
• وده بيدل إن الكلب كان مهم مش بس كحيوان مستأنس للحراسة والصيد، لكن كمان له دلالة دينية وروحية.

3. الأسد (ماعو)

• اسم الأسد في المصرية القديمة كان “ماعو” (maiu).
• الاسم ده بيرتبط بصوت الزئير “مااا” أو “غااا”.
• الأسد كان رمز للقوة والشجاعة، وارتبط بالإلهة “سخمت”، إلهة الحرب والحماية.

4. الضفدع (كيرير)

• الضفدع كان معروف في المصرية القديمة باسم قريب من “كيرر” أو “كيريت”،
  وده واضح إنه مأخوذ من صوت النقنقة بتاع الضفادع خصوصًا على ضفاف النيل.
• الضفدع ارتبط بالخصوبة والتجدد بعد الفيضان.
• الإلهة “حقت” (برأس ضفدع) كانت رمز الولادة والحياة الجديدة.

5. البومة (مووت / تووت)

• في الهيروغليفية كان رمز البومة بينطق “موت” أو أحيانًا صوت قريب من “أوووت”.
• الاسم مرتبط بالصوت المميز للبومة في الليل.
• البومة كان لها رمز لغوي مهم جدًا في الكتابة الهيروغليفية كحرف “م”.

6. أبو طُريشة (ف / إف)

• الثعبان أبو طُريشة (واحد من أشهر أنواع الثعابين في مصر) اتاخد اسمه في الهيروغليفية ليعبر عن حرف الـ F.
• الصوت “ففف” أو “إففف” اللي بيصدر عن طريق نفخ الهواء بيفكر بصوت الهسيس اللي بيعمله الثعبان.
• وده مثال رائع إزاي المصري القديم ربط بين صوت الحيوان واستخدامه في الكتابة.

جدول أسماء الحيوانات المأخوذة من أصواتها في مصر القديمة

الطريقة دي في التسمية مش بس بتأكد قرب المصري القديم من الطبيعة، لكنها كمان ورّت العالم إن اللغة ممكن تولد من أبسط وأجمل حاجة: الأذن اللي تسمع والصوت اللي يتحول لكلمة.